Jordbruket
I yngre jernalder skjedde det ei intensivering av jordbruket i Nordfjord. Ei av hovudårsakene til denne intensiveringa er truleg ei folkeauke som førte til at det dyrka arealet kunne utvidast. I denne perioden tok menneska også i bruk nye reiskap som harv, greip, slede, nye selety og dragordningar til trekkdyra.
Truleg hadde husdyrhaldet størst auke i yngre jernalder. Beitearealet vart viktig og ressursane i utmarka vart i større grad tatt i bruk. For gardar som hadde dårlege høve til åkerbruk og som måtte basere seg på husdyrhald, var tilgangen til fjellbeita svært viktige. Overskotet frå husdyrhaldet, som ull, smør og skinn vart brukte som betalingsmiddel og som handelsvarer.
Kjelder:
Kari Charlotte Larsen, Sagastad. Arkeologisk-historisk presentasjonssenter. Forprosjekt, fagleg utgreiing om innhaldet i senteret.
