Busetnaden
I eldre jernalder var det tett busetnad i Gloppen og Stryn. I yngre jernalder ser det ut som busetnaden i desse områda aukar, i tillegg breier han seg til nye område. I slutten av merovingartid og i tidleg vikingtid skyt busetnaden fart overalt i Nordfjord. Den nye busetnaden finn vi ofte i område som er dårleg eigna for jordbruk som til dømes høgt til fjells og langt inne i fjordarmane. Også ytst ved kysten finn vi ny busetnad i denne perioden.I ytre Nordfjord var det tett busetnad ved Moldefjorden i Selje og på øya Selja. På Liset i Bremanger er det funne spor etter kortvarige opphald grunna fiske og fangst. I Gloppen aukar talet på funn i heile perioden. Funna kjem delvis frå gardar som også var busette i eldre jernalder og frå gardar som vart rydda i yngre jernalder. Både i Loen, Olden og i Stryn ser det ut som busetnaden var nærast eksplosiv. Rike funn frå merovingartid og vikingtid på Nordfjordeid tyder på at staden var eit regionalt maktsenter i perioden.
Kjelder:
Kari Charlotte Larsen, Sagastad. Arkeologisk-historisk presentasjonssenter. Forprosjekt, fagleg utgreiing om innhaldet i senteret.
