I Noreg er det ikkje funne så mange restar av menneske frå steinalderen. Skjelett inneheld kalk og blir lett oppløyste i eit surt jordsmonn. Nokre av gravfunna i Noreg frå yngre steinalder fortel likevel litt om dei religiøse tankane til bøndene i steinalderen. Det var mellom anna vanleg å sende med menneska ting i grava. Arbeidsøkser, stridsøkser og ein sjeldan gong keramikk vart gitt til den døde. Dette tyder på at menneska i steinalderen trudde på eit liv etter døden.

I Noreg er det også funne sigdar og økser av flint i myrer og tjern, under ei helle eller i ein bergsprekk. Øksa var eit symbol på grøderikdom og sigden vart brukt til innhausting av korn. Arkeologane trur at begge desse reiskapane vart ofra for å sikre gode avlingar på åkeren og ein fruktbar dyreflokk.

I danske myrer er det funne mange godt bevarte graver frå steinalderen. Funn tyder på at det lenge var vanleg å gravlegge den døde i kjøkenrestane. Arkeologane er ikkje sikre på kvifor ein sjeldan finn heile skjelettet i desse restane. Nokre spekulerer i at den døde vart delt opp og gravlagd på forskjellige stader.

Nokre funn tyder på at enkelte jegerstammar var kannibalar. Merker etter skrap og snitt i margen på enkelte menneskebein viser dette. Arkeologane veit ikkje om menneska åt kvarandre fordi dei var svoltne og trong mat eller om det var for å få i seg krafta til det døde mennesket. Nokre gravfunn tyder også på at enkelte menneske vart tvinga til å følgje døde menneske i grava.

Kjelder:
Ole Røsholdt, Steinalderen, Gyldendal Norsk Forlag, Oslo, 1996
Anders Hagen & Gerd Hennum, De første nordmenn, Oslo, 1975