Vindskjerm
Om somrane, når det var varmt i veret, sov dei kanskje under ein vindskjerm av to stolpar med skinn mellom.

Skinntelt
Skinnteltet vart strekt over stolpar av tre eller kvister. Tunge steinar heldt skinnet på plass. Enkelte stader brukte kanskje menneska kvalbein for å halde skinnet på plass.

Jordgammer
Jordgammene var delvis gravne ned og hadde veggar av torv, kvistar og kanskje leire. Dei kunne vere ganske store og fleire familiar kunne bu saman. Grunnforma var ofte oval. Taket vart halde oppe ved hjelp av stolpar.

Hellerar og holer
Hellerar og holer gav godt ly for ver og vind og menneska slapp å setje opp telt og gammer. Streifande grupper vende tilbake til hellerane og holene år etter år og brukte dei som utgangspunkt for jakt og fangst. Vistehulen på Jæren, Skipshellaren og Ruskeneset ved Bergen og Grønehellaren i Sogn er døme på stader som vart brukte av menneska i tusenvis av år.

Det organiske materialet som er funne i hellerane gir arkeologane gode høve til å studere dietten til menneska i steinalderen. Funn frå Ruskeneset utanfor Bergen viser at jegerane som kom dit hadde med seg korn og eit og anna tamdyr. Dette tyder på at dei både dreiv åkerbruk og husdyrhald der dei heldt til størstedelen av året. Både kornet og husdyra kan vi rekne med var nistemat dersom fangsten slo feil.

Steinaldergardar
Mot slutten av steinalderen og mot bronsealderen vart menneska meir bufaste. Dei hadde husdyr og dyrka jorda. Frå denne tida finn vi spor etter steinaldergardar i Noreg. Husa var avlange, og ramma var av kraftige stolpar av tre. Veggane var av kvistar og greiner som var klint saman av leire og strå. Taket var grastorv eller strå.