Lengst ute mot Frøysjøen på Nordbotnane i Bremanger ligg to store steinrøyser frå bronsealderen. Den største er heile 36 meter i diameter og 3-4 meter høg. Røysa har ein brei brem og eit 10 meter stort krater på toppen. Den andre røysa ligg 500 meter nord for den største røysa. Denne er 24 meter i diameter og om lag 2 meter høg. På toppen er eit hol på om lag 6 meter i diameter. I botnen av holet står ei opa kiste mura av tynne heller. Ho er 2,05 x 0,55 meter lang og ein halv meter djup. Botnen i kista er dekt av små rullesteinar. I kista er det funne beinrestar.

På Sørbotnane i Bremanger ligg det også ei rekkje røyser. Alderen er uviss, men dei kan vere frå bronsealderen. Den største av desse er 30 meter i diameter og 4 meter høg. Ho ligg på ein stor, naturleg haug nær sjøen. Også denne røysa har eit djupt søkk i toppen. Nær Søre Botn fyrlykt ligg også ei stor røys. Denne røysa er 25 meter i diameter og om lag 2 meter høg. Den er stygt utkasta og har truleg vore høgre.

Røysene på Botnane får oss til å undre over kva folk som fekk slike store gravminne. Det må ha vore eit veldig slit å bygge dei store haugane, og mange folk må ha vore i sving i lang tid.